O equipo de deportes de Adiante Galicia ofrécevos como cada semana o resumo da xornada futbolística na Costa da Morte.
Redacción (@AdianteGalicia)
Na Terceira División, temos malas noticias para o fútbol costeiro logo de que o Laracha confirmase o seu descenso á Preferente Norte tras a súa derrota na Magdalena co Racing Villalbés.
Mentres que o Bergantiños segue soñando con eses postos de playoff tras vencer ao Rápido de Bouzas cunha gran actuación da dupla Roberto Piñeiro-Ekedi nun encontro que se resolviu con dous goles do dianteiro camerunés tras dúas asistencias do santiagués.
Na Preferente Norte, o Xallas de Santa Comba complícase a vida cunha derrota en Fontenla ante un rival directo pola permanencia como é o Estudiantil, que practicamente certificou a súa continuidade na categoría coa súa victoria en Santa Comba. Por outra banda, un Dumbría, que xa cumpriu co seu obxectivo, caía por 2 a 0 na súa visita a un Noia que soña co ascenso á Terceira División.
Na Primeira Autonómica, o Baio decía adeus ás súas opcións de promoción coa súa derrota pola mínima co Unión e a victoria do Puebla, mentres que o Sofán volvía a senda da victoria na súa visita ao Silleda tras cinco xornadas sen gañar.
No derbi comarcal, Soneira e Corme empataban a un gol na mañá deste domingo nun encontro no que se adiantaban os cormeláns dende os once metros cun gol de Toniño e Mario, tamén desde o punto de penalti facía o definitivo 1-1.
Un mermado Malpica, que se desprazaba con tan só doce efectivos, vencía ao Cordeiro a domicilio por 1 a 2. E a Esteirana caía na casa ante o Agolada por 1 a 3, a pesar de adiantarse no marcador.
Na Liga da Costa, o trío de cabeza non fallou e o título decidirase na última xornada. O Sporting Zas superou ao Ponteceso por 5 a 1, o Outes sufriu para superar por 1-2 a un Sporting Seaia, que xa é equipo de terceira, e o San Lorenzo venciu por 4-1 ao Buño.
O cuarto clasificado, o Castriz, remontou en San Pedro o gol inicial do Carnota para acabar vencendo por 3 a 1, mentres que o Mazaricos superou ao Cee por 2-3 e segue redondeando unha gran tempada. O Fisterra goleou ao colista por 1 a 5 e xa é o sexto clasificado tras superar a un Baíñas que caíu derrotado na súa visita a As Redondas ante un Cabana que confirmou a súa continuidade un ano máis na Liga da Costa ao igual que o Porteño que continuará na categoría a vindeira tempada tras vencer a un combativo Volantes de Baño.
E, por último, o Monte Louro son virtualmente equipo de terceira autonómica a pesar de vencer ao Camariñas no Agra de Filgueira. Os muradáns terán que esperar a que finalice a promoción de ascenso á Primeira Autonómica para saber en que categoría xogarán a vindeira tempada.
Na Terceira Autonómica, o Cerqueda proclamouse campión da categoría por primeira vez na súa historia logo da derrota do Ameixenda en Corcubión por 5 a 3, a pesar de que os da parroquia malpicana caían por 3-0 na súa visita a Arliña co Muxía.
Por outro lado, o Coristanco seguirá pelexando pola segunda posición co Ameixenda logo de vencer ao Nantón por 5-1. No duelo de colistas, o Laxe venciu ao Castrelo por 2-0 no Municipal con goles de Santi e Dani Pose.