A deputada de plans provinciais, Cristina García, visitou o concello de Corcubión co deputado Xosé L. Penas, onde presentou os datos do Plan Único e coñeceu algunhas das obras financiadas cos fondos da Deputación.
Mantiveron un encontro co alcalde Francisco Xabier Domínguez e con membros da corporación local.
O Plan Único contempla en toda a comarca de Fisterra un investimento de máis de 3 millóns de euros para 2024, que se reparten entre os concellos de Corcubión, Muxía, Dumbría, Fisterra e Cee. Esta cantidade inclúe o importe da fase inicial, que alcanzou os 1.681.197,34 € e o adicional, cuxas partidas foron aprobadas o pasado venres no pleno da Deputación, que suma 1.645.311,97 €.
Plan Único Corcubión
Con respecto a Corcubión, García informou que chegan ós 251.260,59 € sumando os 126.985,56 € da fase inicial e os 124.275,03 € da adicional. Financiaranse actuacións no casco histórico.
“En casos coma este de Corcubión é nos que o Plan Único cobra todo o seu sentido”, salientou Cristina García. “Esta ferramenta está pensada para que os veciños e veciñas de concellos pequenos, como o de Corcubión, poidan ter mellores servizos e, polo tanto, unha mellor calidade de vida”.