//Denuncia a perda de subvencións pola falta de conta xeral// Advirte que haberá consecuencias no tema do asesor//
O portavoz do Partido Socialista e primeiro tenente de alcalde xalleiro, José Antonio Ucha, fixo unha emenda á totalidade do balance que o seu socio de goberno e alcalde, David Barbeira, fixo recentemente en Radio Xallas, ao que acusou de “mentir sistemáticamente”.
Perda de subvencións pola falta de Conta Xeral
Ucha denunciou a situación de parálise existente:”Nas xuntas de goberno non se aproba absolutamente nada. Non se conceden licencias, nin se fan ordenanzas”.Pero ademais “estamos perdendo un lote de subvencions porque non se presentou a conta xeral”.
“Eu estiven de alcalde e nunca marchei pola porta de atrás”
Sobre as alusións de Barbeira á falta de autocrítica de Ucha, respondeu.”Son unha persoa excepcional. Levo 16 anos e sigo tan limpo como cando entrei e esixo os mesmos estandares. Aquí non se desvía nin un céntimo para cousa ningunha. Eu estiven de alcalde e nunca marchei pola porta de atrás”.
Orzamentos en Santa Comba
Tampouco entende como o mandatario anuncia que está traballando nuns orzamentos:”Non me consta aínda que formo parte do goberno. Non creo que sexa a mellor maneira enterarse pola prensa. Cun só concelleiro é difícil chegar a consensos” sinalou.
A polémica da chatarra
Nunha entrevista no programa “Na Encrucillada”, o portavoz do PSOE quixo aclarar con respecto á polémica da chatarra, que “nin mandamos levar a chatarra nin dixemos onde tiña que ir”. Restoulle credibilidade a David Barbeira ao que definiu como “temerario”.
Explicou que “apareceron tres albaráns porque íamos a denunciar a desaparición da chatarra na Garda Civil”. Pero dubidou que se cobren as cantidades pendentes xa que o concello non conta con autorización para “entregar chatarra”.
”Van a ter que pagar as consecuencias”
José Antonio Ucha Velo advertiu que “non se pode saltar o que diga o pleno” e con respecto ao asesor da alcaldía, haberá responsabilidades políticas e xurídicas, se non actún en consecuencia co mandato plenario:”Van a ter que pagar as consecuencias”.
Asociación de concellos do Camiño de Fisterra e Muxía
Ucha falou da proposta de asociación de concellos do Camiño de Fisterra e Muxía e pediu “ser serios e actuar reflexivamente”, mantendo a súa postura de que as cotas non poden ser iguais porque “o beneficio non vai a ser o mesmo do que ten un kilómetros e medio co que ten trinta kilómetros”.
“Tal vez nos interese un camiño por Santa Comba” ou potenciar a ruta por Brandomil, reflexionou Ucha.
Alcaldía con data de caducidade
Lamentou a falta de xestións do alcalde no “reparto de rutas” cun “estaría de churrascada e punto”.Manifestou que os socialistas de Santa Comba “demos a nosa confianza por tempo limitado e tomaremos medidas. Non se están facendo as cousas como se debían de facer pero seguimos remando”.
Engadiu que, en principio, a alcaldía ten data de caducidade dentro de 16 meses. O que ten claro Ucha é que “hai un desencanto xeralizado. Estamos igual de insatisfeitos que cando estabamos na oposición”.
