O director xeral de Planificación e Ordenación Forestal da Consellería do Medio Rural, José Luis Chan, asegurou que se están incoando distintos expedientes nas zonas de Braña da Serra e Braña Rubia (Loira) nos concellos de Santa Comba e Coristanco, froito das denuncias de Ecoloxistas en Acción.
Segundo Chan, as investigacións determinarán se de debe sancionar ou proceder ao seu arquivo. Lembrou que , a nivel xeral hai unha moratoria que “prohibe as novas plantacións de eucalipto” e que a Xunta “actúa sempre que ten constancia dunha infracción”.
Braña Rubia no inventario autonómico e nacional
Avanzou que “Braña Rubia (Loira) será incluída no inventario nacional e autonómico”. Con respecto á “Braña da Serra” indicou que “hai zonas con plantacións de eucalipto de mesmo antes da implantación da Rede Natura de Galicia”, e ubicou a esta paraxe nun “status” diferente á anterior.
José Luis Chan informou que a finais de maio chegaron as denuncias e solicitaron informes aos distritos forestais. Confirmou que no territorio do concello de Coristanco “Hai actas de denuncia formuladas por plantacións de eucalipto nítens”.
Fixouse un período de alegacións e “non se descartan novas denuncias”.
En principio, a incidencia é menor no municipio de Santa Comba, onde “se están levantando actas para comprobar se hai infraccións”. E á marxe das parcelas denunciadas por Ecoloxistas en Acción están “a analizarse outras parcelas de oficio”.
O PSOE pide recuperar os espazos afectados
A cuestión chegou á comisión de Agricultura, Alimentación, Gandaría e Montes por iniciativa do deputado socialista Martín Seco que denunciou unha “plantación masiva de eucalipto en zona de turbeiras” en Braña Rubia (Loira) e Braña da Serra.
“Os humidais deberían ser esenciais para a loita contra o cambio climático” sinalou Seco que valorou que Medio Rural adoptase medidas:”Vexo que están a tomar acción, pero pídolles presa para evitar que estas zonas síganse degradando e tentar que volvan a normalidade e se conserve ese fermoso brezal”.
Martín Seco pediu que se recuperan os espazos danados e denunciou que existen máis humidais afectados na provincia coruñesa. O parlamentario do PSOE visitou fai uns meses as zonas en cuestión en Santa Comba e Coristanco.
