O secretario de Benestar Animal de Podemos Galicia, Rubén Sueiras, manifestou que “a caza non se está amosando como solución para a xestión do xabaril” e que incluso esta actividade “pode xerar un efecto rebote”.
Sueiras lembrou que “o xabarín é un animal moi intelixente, con capacidade de adaptación” e que a Xunta debería de optar por outras alternativas despois de “estudar sobre o terreo” a presenza deste animal.
Entrevista a Rubén Sueiras en Radio Xallas- Desde o minuto 40
Convenios a medida coa Federación de Caza
Criticou que a Xunta conceda subvencións con “convenios a medida” coa Federación Galega de Caza cando esta práctica non conta con respaldo social xa que “menos do 2% da poboación galega ten licencia de caza”. Tamén lamenta que se “trate de equiparar a figura do cazador a de calquera outro deportista”.Para o dirixente de Podemos “a regulación do ecosistema faise de xeito automático” e non precisa da caza.
Lei de Benestar animal
En relación aos recentes casos de maltrato animal visibilizados a través das redes sociais, e con respecto a Lei de Benestar Animal, incidiu na necesidade da prevención e denuncia que a pesar de que “está a aumentar o número de denuncias e a sensibilidade social,a Xunta non parece que lle dea moita importancia a esta norma, porque parece ser que hai expedientes que están a caducar”.
Rubén Sueiras engadiu:”Existen casos de brutalidade que non teñen resposta institucional. Non hai unha condena explícita a actos como o que vimos estes días en redes sociais dun home arrastrando trescentos metros a un can, amarrado ao seu vehículo”.