A celebración gastronómica de maior relevancia e tradición do Concello da Laracha, a Festa das Cereixas de Paiosaco, celebrarase na fin de semana do 2 e 3 de xullo. O Concello da Laracha –co alcalde, José Manuel López Varela, e os concelleiros Patricia Bello e Ramiro Bello- e a Comisión de Festas de Paiosaco presentaron o programa nun acto celebrado no campo da feira.
O sábado 2 de xullo a festa comezará co VII Aberto das Cereixas de billarda que organiza o Club Billarda Campo da Feira. Pola noite haberá verbena amenizada polo Grupo Studio e os DJ’s Cotton & Yuni.
Xa o domingo, no propio día da Feira das Cereixas -Festa declarada de Interese Turístico de Galicia-, desde o mediodía a escola de samba Malandros amenizará a xornada de feira.
A partir das 19:00 horas a Asociación Cultural Queiroga de Paiosaco ofrecerá un espectáculo de música e baile tradicionais galegos.
Guadi Galego na Festa das Cereixas
Pola noite, a partir das 22:00 horas, porase o broche de ouro á Feira das Cereixas co concerto de Guadi Galego. A que fora vocalista, pianista e gaiteira de Berrogüeto iniciou en 2009 unha destacada carreira en solitario que a levou a ser unha das artistas máis relevantes da escena galega actual. En Paiosaco cantará os temas do seu último disco, Costuras.Na organización deste programa contouse coa colaboración da Deputación da Coruña.
