Visita institucional a Fisterra e as sedes de ASPADEX e APEM en Cee.
O presidente da Deputación provincial da Coruña, Valentín González Formoso estivo de novo na Costa da Morte, para realizar unha visita institucional ao concello de Fisterra e para visitar en Cee os centros APEM e ASPADEX. Estivo acompañado polo deputado de Vías e Obras e alcalde de Dumbría, José Manuel Pequeño Castro.
Na vila da fin do mundo, entrevistouse co alcalde José Marcote e con membros do seu goberno, entre eles o tenente de alcalde, Kuka Sar. O presidente da Deputación destacou a “singularidade de Fisterra” coma un destino turístico de referencia xa que «xunto coa Catedral de Santiago, o faro de Fisterra representa o outro final das rutas xacobeas, nun lugar emblemático onde os romanos situaron a fin do mundo».
Lembrou que o concello de Fisterra recibirá a través do Plan único uns 927.000 euros no bienio 2017-18.Puxo en valor o esforzo do executivo local por dotar de servizos a un concello de menos de 5.000 habitantes pero que recibe milleiros de turistas.
Neste sentido, o rexedor fisterrán apuntou que o seu goberno traballa actualmente no PXOM do municipio e nun plan estratéxico de turismo, que entenden «fundamental para o futuro do concello».Antes de visitar Fisterra, González Formoso visitou as sedes de ASPADEX e APEM.
