«Non serei un Secretario Xeral tutelado. É hora de que a militancia tome as rendas do novo PSdeG”.
Xosé Manuel Lema
“Sen etiquetas nin tutelas”
Xoaquín Fernández Leiceaga está “on the road”. Xa comezou en Vilagarcía a súa particular campaña para buscar o apoio dos militantes co obxectivo de subir un novo chanzo na escaleira de poder do socialismo galego.
Despois de derrotar a Méndez Romeu e converterse en candidato á presidencia da Xunta e voceiro parlamentario, agora medirase (en principio) a Gonzalo Caballero e a Juan Díaz Villoslada.
As súas primeira mensaxes pretenden trasladar á militancia que é un candidato “sen etiquetas nin tutelas” que “non se presenta para gardarlle o sito a ninguén, nin para estar á sombra de ninguén nin para facer a política de outros”.
Tres eixos de acción
A proposta política de Xocas xira sobre tres eixos:”A reconstrución do partido, para convertelo nun instrumento político máis forte, con maior unidade e integración; converter ao PSdeG na forza hexemónica da esquerda e dende esa posición construír unha alternativa de goberno para poñer fin á etapa do PP na Xunta de Galicia”.
Na súa presentación a pasada fin de semana o deputado socialista insistiu en que se presenta “para reconstruír o Partido, dende a unidade e a integración, con fortaleza e coherencia, aspirando a ser hexemónicos na esquerda.Galicia necesita unha alternativa política crible dende a esquerda, e para iso precisamos un partido socialista forte e unido”.
Reforzar o traballo nos concellos
Unha das súas prioridades é a de reforzar ós representantes socialistas nos distintos concellos de cara ás eleccións municipais e tamén dinamizar a vida do partido.
No seu encontro en Vilagarcía manifestou:”Fai máis dun ano que non se convoca o Comité nacional Galego, e precisamos unha dirección sólida que impulse ao partido”.
Calendario das primarias
A votación para elixir ao novo secretario xeral será o vindeiro 8 de outubro. E a campaña informativa dos candidatos entre o 26 de setembro e o 7 de outubro.