Juan Carlos Piñeiro é o único candidato á secretaria xeral de Compromiso. Para o Consello Político hai 43 candidatos.
O candidato ás pasadas eleccións polo provincia de Lugo e membro da executiva de Compromiso por Galicia, Juan Carlos Piñeiro Docampo presentou a súa candidatura a encabezar o proxecto do partido galeguista, que o sábado 21 de xaneiro celebra o seu II Congreso Nacional.
Piñeiro:”Compromiso será a sorpresa nas eleccións municipais”
Non terá adversario e polo tanto será o substituto de Xoán Bascuas, que estivo a fronte da organización durante os seus catro anos de vida.Piñeiro Docampo entende que “este é un proxecto necesario para o país” e que o futuro de Compromiso “está aínda por escribir”.
Amosouse animado ante esta nova etapa na que pensa que o obxectivo é “asentar o crecemento territorial na nosa estrutura” ante o reto das vindeiras eleccións municipais de 2019, nas que está convencido de que a formación galeguista “será a sorpresa”.
O candidato á secretaria xeral de Compromiso indicou que decidiu presentarse ante a petición de compañeiros do partido e despois dun percorrido por distintas agrupacións.
Renovación do Consello Político
Pero a renovación de Compromiso por Galicia non só afecta ao novo secretario xeral, e tamén se estenderá ao Consello Político Nacional. Hai 43 candidatos para ocupar 30 postos. Nunha boa parte xente nova, polo que desde o partido consideran que “a idea de renovación e reinicio queda totalmente acreditada”.
Este sábado, o último Consello Político dirixido por Xoán Bascuas validou as candidaturas e tamén dou conta das emendas presentadas aos tres documentos de debate: o de Política, o de Estratexia e o de Estatutos.
Compromiso por Galicia comezou a súa andaina en 2012, data na que celebrou o seu congreso fundacional. Agora afronta unha nova cita na que Juan Piñeiro será o encargado de acadar o obxectivo de seguir consolidando esta opción política, que está presente en varios concellos e ostenta alcaldía como as de Lalín ou Muros.
@AdianteGalicia