Dúas persoas resultaron feridas por mor dun incendio producido nunha vivenda no lugar de Centiña, no municipio coruñés de Coristanco. Ao redor das 23:40 do domingo, unha particular chamou ao CIAE 112 para pedir axuda pois acabara de chegar a casa e atopou un incendio na súa cociña.
Inmediatamente, os xestores do 112 Galicia informaron os Bombeiros de Carballo, aos GES de Ponteceso e aos voluntarios de Protección Civil de Coristanco, ademais da Garda Civil de Carballo. Tamén, tras indicar a alertante que unha persoa podía necesitar asistencia sanitaria, informaron da situación ao 061- Urxencias Sanitarias.
Unha vez extinguido o lume, os axentes de Garda Civil confirmaron que foron dous as persoas afectadas polo incendio: unha muller que queimara o brazo e o coiro cabeludo, e un home que queimara as xemas dos dedos. Ambos se magoaron mentres tentaban axudar a apagar o lume e foron trasladados por unha ambulancia do 061- Urxencias Sanitarias ao P.A.C. de Carballo.
Segundo se informou ao 112 Galicia, as chamas foron orixinadas na cociña da vivenda, facendo con que se incendiase o alpendre.
