Alberto Varela: “Son un piloto moi tranquilo”

O piloto carballés comezou a correr no autocross no ano 2009 cando tan só tiña dezaseis anos.

Esta tempada, a falta dunha proba para o remate do campionato e por primeira vez dende que comezou neste deporte, Alberto Varela proclamouse campión galego da categoría de menos de 1600cc a bordo do seu Citroen Saxo.

O piloto da Peña Autocross Arteixo dominou o campeonato de principio a fin, gañando seis das nove probas que se celebraron ata o momento.

David Castro (@DavidCastro27)

P- De onde che vén esta paixón polos coches?

R- Desde pequeno que ía ás carreiras con meu pai e outros coñecidos, e desde cativo fun sempre ao autocross e sempre me gustou.

P- Como comezaches nesto do autocross?

R- Con 15 anos dóuseme por marchar comprar un coche e supostamente si o compraba, meus pais non me deixaban entrar na casa (risas). Aínda así, un amigo e máis eu marchamos para Ferrol e finalmente compramos un coche. Despois fómolo facendo pouco a pouco, coa axuda do mecánico que tiñamos aquí en Motor Carballo e que tamén corría en autocross, ata que comecei a correr.

P- Como te defines como piloto?

R- Moi tranquilo. Xa logo me da igual quedar primeiro que terceiro, son moi tranquilo.

P- Dos circuitos que compoñen o campionato galego cal é o que máis che gusta? Por que?

R- O José Ramón Losada de Arteixo pola afección que acude a el nas probas, polo trazado tan rápido que ten e polo bo estado no que se atopa sempre.

P- E o que menos che gusta? Por que?

R- O de Viduedo (San Cristovo de Cea, Ourense) polo estado da pista, horarios e porque nunca cumpren as cousas.

P- O teu mellor momento no autocross, é este título galego acadado o pasado 10 de outubro?

R- Sí, claro está, sin dúbida ningunha.

P- Cal foi o teu peor momento dende que comezaches nesto do autocross?

R- O peor foi o segundo ano que corrín. Sin ter nin idea, nunha das carreiras  púxenme segundo na saída da semifinal pero ao chegar á terceira curva envorquei e desfixen todo o coche.

P- Que sentiches ao finalizar a carreira de O Castro cando soubeches que eras o novo campión galego de autocross na categoría de -1600cc?

R- De todo. Alegría, emoción. Non se pode describir.

P- Supoño que para ti este campionato galego que lograches en terras rianxeiras é moi especial por dous motivos. En primeiro lugar porque é o primeiro título que consigues e por outro lado por suceder no máis alto ao teu compañeiro e amigo Daniel Gorín. É así?

R- Sí, en primeiro lugar nunca pensei que fose capaz de gañar. E o ano pasado despois de gañar el, sempre me dicía que tiña que este ano tiña que gañar eu e  eu decíalle que non ía ser capaz pero ao final por sorte saíu ben.

P- A quen lle adicas o campionato galego conseguido na presente tempada?

R- A todo o equipo. A toda esa xente que traballa no coche, que me axuda e que me acompaña nas carreiras.

P- A vindeira tempada veremos a Alberto Varela defendendo o título de menos de 1600cc ou cambiará de categoría?

R- Eso aínda non se sabe. Si facemos todo o campionato, seguiremos en menos de 1600cc pero si decidimos facer probas soltas seguramente probaremos en máis de 1600cc.

P- Poderemos verte competindo en todas as probas do campionato de España?

R- Por agora non hai presuposto para competir no campionato de España. Si houbese presuposto animábame pero mentras non o haxa, hai que competir por aquí.

P- Xa para rematar, como afrontas a última carreira do campionato galego que se disputará o vindeiro 14 de novembro no circuito Xacobeo Motor Sport de Lavacolla?

R- Intentaremos facelo o mellor posible pero sin presión ningunha. Ata agora, sempre houbo presión pero agora xa nos dá igual porque temos o traballo feito.