O legado de Alfredo Brañas, máis preto da xente

Libros, fotografías e cartas de Alfredo Brañas foron cedidas polo seu sobriño Santiago González Brañas.

@xmlema

Sete caixas de cartón chegaron a Carballo nun taxi. Dentro delas parte do legado de Alfredo Brañas. Libros, fotografías e cartas que conforman un auténtico tesouro cultural dun escritor e xurista nado na capital de Bergantiños no 1859, e que deixou textos como “El regionalismo” que deixaron unha fonda pegada no país.

Pois este 7 de febreiro o alcalde de Carballo, Evencio Ferrero, e o sobriño-neto de Brañas, Santiago González Brañas, asinaban a cesión deste material. Será o concello de Carballo o encargado de clasificar toda esta valiosa herdanza e de poña ao alcance da sociedade.Había moitas testemuñas que asistiron a este momento histórico. O patrono da Fundación Alfredo Brañas, Manuel Varela Rey, membros da corporación local e tamén da comisión veciñal que traballa pola recuperación da súa memoria.

“Non me nego nunca a vir se podo porque me sinto demasiado agradecido. Vós diredes que Alfredo Brañas só naceu aquí e estivo dous anos, pero el, cando foi a homenaxe que lle deron polo éxito do libro El Regionalismo, e así o recollen os xornais, levantouse para agradecer o escrito de adhesión que asinaran 400 veciños de Carballo” asegurou González Brañas.

. “Eu creo que é un xesto de recoñecemento aos herdeiros e tamén á propia figura de Brañas, que é o único carballés ilustre que temos e fillo predilecto por unanimidade da corporación municipal. Somos nós os que estamos agradecidos”, respondeu o alcalde de Carballo.

Todos eran consciente da importancia deste momento. Unha xornada que se completou cunha visita guiada ao IES Alfredo Brañas e cun xantar na taberna O´Mexilón situada na planta baixa da casa na que naceu Alfredo Brañas o 11 de xaneiro de 1859.