A camariñá Paula Mouzo Mas volve ao Parlamento de Galicia. Tomará posesión do seu cargo no pleno que se celebrará o vindeiro martes 14 de maio.
Esta semana, xa participou na comisión parlamentaria de Pesca e Marisqueo, sendo elixida Vicepresidenta da citada comisión.
En declaracións a este medio, Paula Mouzo afirmou sentirse “moi ilusionada e con ganas de traballar por Galicia, a Costa da Morte e a miña Camariñas”.
Destaca que os meses que estivo de deputada na anterior lexislatura supoñen unha boa experiencia para esta nova etapa.
Recoller demandas a pé de rúa
Agradece a confianza do presidente Alfonso Rueda e do Partido Popular e xa está disposta a traballar “en todos os asuntos que teño en mente, en propostas que recibimos no seu momento, e tamén as demandas que continuaremos recollendo a pé de rúa”.
A tamén portavoz do Partido Popular de Camariñas amosouse convencida de que “os feitos avalarán as miñas palabras cando remate a lexislatura”.
Paula Mouzo foi no posto 23 nas eleccións autonómicas de 2020. Nas últimas ocupou o posto 14, unha mostra da aposta que fixeron por esta percebeira da Costa da Morte.
