A Gran Tractorada de Reis encherá de cor e ilusión Mazaricos mañá pola tarde
• A tractorada pecorrerá as rúas da Picota dende as 5 da tarde.
• Ao remate celebrarse unha recepción e reparto de agasallos no recinto feiral.
Os Reis Magos volven mañá, xoves 5 de xaneiro, para traer ilusión, alegría e agasallos a todas as nenas e nenos de Mazaricos. As rúas da Picota acollen dende as 17h a Gran Tractorada de Reis, un evento co que as súas Maxestades de Oriente poñen o broche a unha completa programación de Nadal reivindicando o carácter rural de Mazaricos.
Posteriormente, celebrarase no recinto feiral unha recepción e reparto de agasallos entre todas as nenas e nenos asistentes por parte dos Reis Magos e os seus axudantes.
Con esta tractorada, remata unha programación de Nadal marcada polo retorno á normalidade tras dúas edicións condicionadas pola pandemia. Neste Nadal mazaricán houbo eventos para toda a familia e todos os gustos, incluíndo circo, teatro, un concerto de aninovo ou un baile dos maiores. Tamén se recuperou a Carreira do Leite e mais o Brinde Leiteiro.
Nota de prensa do Concello de Mazaricos
