David Durán Arufe ofreceu un concerto en Pontevedra e presentou a súa tese de Doutoramento.
Os pianistas David Durán e Haruna Takebe ofreceron, o pasado venres 9 de xuño, unha intensa e emotiva velada musical na Basílica de Santa María a Maior, de Pontevedra, con temas de T. Hosokawa e T. Takemitsu que serviron tamén como tributo ao profesor xalleiro, José Durán Martínez, pai de David, que finou recentemente.
En “Caligrafía do Son” as interpretacións de Durán Arufe e Hakuna Takebe mesturáronse coa caligrafías de Aoi Yamaguchi e as videocreacións de Masako Hattori. Todo nun espazo moi propicio.
Doutoramento de David Durán
O músico xalleiro tamén é noticia porque fai uns días presentou a súa tese de Doutoramento na Universidade de Santiago de Compostela que recibiu a máxima cualificación, o “cum laude”.
A tese de David Durán Arufe versou sobre o compositor xaponés Toshio Hosokawa.“A súa música causoume unha fonda impresión dende que a coñecera como estudante na Universidade das Artes de Amsterdam”, explicou Durán ao xornal de USC
“Xordeu en min unha gran curiosidade por explorar o xeito co que podería expresar o seu universo sonoro tan enraizado nas artes e filosofías xaponesas nas que interveñen elementos do Gagaku, do teatro Noh, técnicas instrumentais inspiradas no Shakuhachi ou no Sho e unha concepción caligráfica do son baseada no Shodo a través dun instrumento tan europeo como o piano” engadiu.
