Anova agarda que as coalicións nas que participa obteñan uns “resultados espectaculares” en cidades como Santiago, A Coruña e Ferrol e noutros municipios galegos. Así o afirmou o deputado Antón Sánchez, nunha entrevista no programa “Na Encrucillada” de Fórmula Fun Bergantiños e Radio Xallas.
A pesar de que segundo Sánchez se fixeron “candidaturas de garantías” o problema radicou “na falta de tempo porque había espazo en máis concellos”. O deputado destacou que a idea fundamental é “democratizar os concellos” e puntualizou “o caso de concellos onde hai que loitar polo básico, por recuperar a democracia”, citando os exemplos dos municipios de Ponteceso e Coristanco, gobernados polo Partido Popular.
“Non queremos que haxa veciños de primeira por ser amigos do alcalde.Hai que facer unha política de democracia directa. Que os veciños coñezan as contas e poidan tomar decisións” manifestou Sánchez García.
Antón Sánchez criticou que tanto a administración autonómica como a estatal adoptaron medidas que perxudicaron ós cidadáns:“Nas altas esferas tomáronse decisións contra a maioría das poboacións”