As persoas somos como unha esencia, somos impacientes, vulnerables, arrogantes e sobre todo pouco coherentes con nós mesmos. Basta ollar para os laterais un día calquera da nosa existencia e comprobar que vivimos en demasiada tensión para estar xeralmente disconformes con nós mesmos.
Todo o que nos rodea camiña con moita presa para que na maioría dos casos non demos chegado ó destino con certo éxito. Se analizamos ben as informacións periodísticas darémonos conta de que se nos vende unha idealización que non é real, ou o que é peor, altérase a percepción das realidades facendo que o cidadán se frustre sen outro obxectivo mais claro que pisar ó rival para resaltar un mesmo dentro dunha corrupta miseria informativa e mediática.
A diario, vemos nos grandes lobbies de comunicación como novas que non contemplábamos como posíbeis nos sorprenden pola súa magnitude e incredulidade e para que nos fagamos unha idea mencionaremos as seguintes: Estados de corrupción millonarias, promesas de progreso inalcanzables, manipulación de datos segundo o interese, utilización de datos persoais falseados, opresión das sensibilidades distintas ás do poder económico establecido, falla de compromiso público e social dos poderes estatais e un longo etcétera de miserias.
Por entrar un pouco en materia, diremos que en Galicia vense agravados este tipo de factores negativos, debido ( parécenos a nós ) a que somos un pobo serio, traballador e humilde, mesturado na actualidade con diversas culturas, mais co agravante de que confiamos pouco en nós mesmos e nas nosas posibilidades de desenvolvemento interno. Isto que acabamos de comentar lévanos a sopesar o porqué despois de tantos anos non fomos quen de gobernarnos a nós mesmos na Xunta de Galicia ( onde gobernan maioritariamente partidos estatais ).
Para xustificar o escrito diremos que non hai dúbida ningunha de que na nosa Terra hai sentimento de galeguismo. Quizais o que falta é valentía e honorabilidade. Certo é tamén que os axentes políticos do nacionalismo excluinte, minoritario e residual non permitiron nunca a apertura dun galeguismo integrador e resolutivo que fixese que os galegos vivísemos mellor. Para corroborar esta apreciación mencionaremos algúns datos que nos axudarán a entendelo.
.- O salario medio galego está por debaixo do estatal e é o quinto mais baixo de España.
.- A renda pércapita galega é menor que a estatal e o que é peor, esta renda concentrase nos 20 concellos mais pudentes, o que quere dicir que os 193 restantes concellos xestionan miseria.
.- Aumenta a porcentaxe de risco da pobreza.
.- A inversión media estatal por cidadán é a metade que a do País Vasco.
.- O atraso na consecución de infraestruturas é maior ca media do estado.
.- As pensións son das mais baixas do estado español
.- A taxa de natalidade é inferior á media.
.- A emigración de xente moza preparada segue facendo que perdamos valor engadido.
.- Perdemos posicións no debate do financiamento autonómico.
Estas e outras moitas razóns deberían ser mais que suficientes para empezar a poñer en valor o noso. Sentirnos orgullosos de ser e vivir en Galicia, tratando de evitar as desigualdades sociais e pensando en aproveitar ben os recursos desta Terra que é tan próspera ou mais que outras do estado español. Hai moita presa e tamén unha aceleración onde parece que para chegar pronto ós obxectivos individuais o mellor é coller o primeiro tren (partido político) que nos leve á estación (representación municipal) sen valorar o sentido común e o esforzo honesto. Ó noso entender, as forzas políticas que actualmente están presentes nos concellos galegos non representan con rigor os seus veciños sobre todo cando din unha cousa e fan outra,e ademais cando a abstención política e o desprestixio son evidentes.
Imos acercándonos a 2019. Galicia precisa un partido galego, inclusivo e europeísta, conformado por xente de diversas sensibilidades e con certa transversalidade, pero crentes de que é posible gobernarse a si mesmos. O perexil ten que estar en tódolos xantares, esa é a esencia do país, e nese cometido andamos. Ese é o noso Compromiso.