O alcalde de Ferrol asegura que a coalición de goberno “vai ter continuidade” e que “todo seguirá igual” na Semana Santa aínda que se rebaixará a subvención económica.
“A relación do goberno é moi boa agora mesmo”
O alcalde de Ferrol, Jorge Suárez está convencido de que o acordo entre Ferrol en Común e o Partido Socialista “vai ter continuidade durante estes catro anos” porque “a cidade precisa un goberno estable”, e apelou a “lealdade” e a unha “comunicación en positivo” para superar as “pequenas diferencias” que poidan existir.
“A relación é moi boa agora mesmo” dixo o alcalde nunha entrevista na Radio Galega, que louvou a Beatriz Sestayo “porque representa os valores da esquerda que aínda que perviven no PSOE”.
Jorge Suárez:“Galicia vai ter voz propia”
Jorge Suárez, membro de Esquerda Unida, comparte o posicionamento de Yolanda Díaz de estar no grupo de En Marea o igual que “a maioría da afiliación”. Sobre o feito que finalmente non haxa un grupo parlamentario propio sinalou que “Galicia vai ter voz propia. A xente o que lle importa é que haxa deputados galegos que defendan os seus intereses”.
Na súa opinión, as reflexións do líder galego de Podemos, Breogán Riobóo foron “desafortunadas e precipitadas”. Avogou por abrir as portas de En Marea “ós militantes do BNG” e destacou a existencia de alcaldes que “van empuxar por unha integración” se ben agora “hai unha corelación de forzas moi diferente”.
Semana Santa:”Non queremos tomar decisións drásticas”
No programa “Galicia por Diante” que presenta Kiko Novoa tamén lle preguntaron pola Semana Santa de Ferrol. Con certa retranca, o alcalde comentou que “non vai haber cruces invertidas” e que “todo vai seguir igual”, destacando que a relación coas confrarías “está calmada” e que o seu goberno non quere “tomar decisións drásticas”. Suárez non quixo precisar a cantidade pero si recoñeceu que se vai reducir a subvención.
