A fantástica labor que veñen desenvolvendo no Centro de Promoción Rural-EFA Fonteboa de Coristanco foi recoñecida de xeito unánime polo xurado dos premios Premio Aresa de Desenvolvemento Rural.
Así o determinou o xurado integrado polo reitor da USC, Antonio López; a vicerreitora de Coordinación do Campus de Lugo, Montserrat Valcárcel; María Cruz Díaz, presidenta da Asociación Nacional de Enxeñeiros Agrónomos; Carme Pampín, CEO de GalChimia, e o presidente de Aresa, Álvaro Rodríguez Eiras.
“Para estar á altura dos retos que se veñen, é necesario contar con profesionais formados e cualificados e a EFA Fonteboa ten unha longa traxectoria na formación do ámbito rural” manifestou Antonio López informando que “tras estudar a fondo todas elas, acordamos por unanimidade que a vencedora desta vixésimo segunda edición do Premio Aresa fose a presentada polo Centro de Promoción Rural-EFA Fonteboa, de Coristanco”.
Pola súa parte, a adxunta á presidencia de Aresa, Carlota López, tamén presente no acto, subliñou unha vez máis “a calidade das candidaturas presentadas, coas que comprobamos o enorme futuro que ten o rural de Galicia”.
Foron trece as candidaturas presentadas. Xunto coa EFA Fonteboa participaron: a Federación de Razas Autóctonas de Galicia (Boaga); Cooperativa Tres Fuciños; Muuhlloa; Timbersoul; Traloagro; Amarelante; DOP O Cebreiro; Estratexia de loita ecolóxica fronte á praga da rata topo; Carabuñas; Gandería María Dolores Vázquez Carballés; Belacolmea, e Comunidade de Montes Veciñais en Man Común de Couso.
A gala de entrega do Premio Aresa de Desenvolvemento Rural, que convocan a Universidade de Santiago de Compostela e o grupo Aresa, terá lugar o vindeiro 11 de marzo, se as condicións sanitarias o permiten.O Premio Aresa está dotado con 10.000 euros e unha placa conmemorativa.
