Un home resultou ferido esta tarde nun accidente de tráfico ocorrido en Carballo. O varón saíuse da vía despois de sufrir un ataque epiléptico ao volante. O seu coche acabou caendo nunha leira.
Os feitos tiveron lugar na Grela, nas inmediacións dun campo de fútbol.
Foi unha persoa particular a que chamou ao 112 Galicia ás 16:00 horas desta tarde. Decontado, o persoal da central de emerxencias do 112 informou a Urxencias Médicas e aos Bombeiros de Bergantiños. A situación tamén foi posta en coñecemento de Protección Civil, da Policía Local e da Garda Civil de Tráfico.
Ata o lugar do sinistro foi mobilizada unha ambulancia, que se encargou de trasladar ao home a un centro hospitalario.