Información facilitada por AXEGA 112
Dúas persoas resultaron feridas tras colidir un turismo e unha furgoneta en Vimianzo
Os Bombeiros de Santa Comba axudaron ao persoal sanitario a evacuar ás dúas feridas, sen ser preciso o uso do material de excarceración.
O persoal do Servizo de Urxencias Sanitarias de Galicia-061, que acudiron ao punto nada mais recibir o aviso dos xestores do 112, derivou ao lugar dos feitos unha ambulancia e un helicóptero, aínda que, finalmente, as dúas mulleres feridas puideron ser trasladadas, por terra, no vehículo sanitario.
Ás 11:00 horas desta mañá, unha persoa particular implicada no accidente, pedía axuda ao 112 Galicia. Indicaba que colidiran un turismo e unha furgoneta ao seu paso polo concello coruñés de Vimianzo, na AC-552, quilómetro 74.6, á altura de Berdoias. Solicitaba aos xestores de emerxencias asistencia sanitaria para ela e para a súa nai, que nese momento non atendía a estímulos, segundo o seu relato.
Con estes datos, desde o 112 Galicia informouse decontado ao Servizo de Urxencias Sanitarias de Galicia-061, cuxos profesionais derivaron ao lugar unha ambulancia e un helicóptero medicalizado. Do mesmo xeito, os xestores de emerxencias puxeron os feitos en coñecemento dos Bombeiros de Santa Comba, da Garda Civil de Tráfico e dos efectivos da Agrupación de Voluntarios de Protección Civil da localidade. Así mesmo, foron informados os operarios do servizo de mantemento da vía.
Unha vez no punto, tras comprobar o estado das feridas, os Bombeiros do Xallas comunicaron ao 112 Galicia que non foi necesario excarcerar, as feridas estaban totalmente liberadas e accesibles, iso si, axudaron ao persoal sanitario a evacuar ás persoas, que finalmente, puideron ser trasladadas en ambulancia ao centro hospitalario de referencia.
