Un axente da Garda Civil faleceu esta tarde nun accidente de tráfico rexistrado en Ribeira. Segundo os datos facilitados ao 112, a moto na que circulaba a vítima bateu contra un turismo.
O sinistro rexistrouse na Avenida da Coruña. Unha persoa particular chamou ao 112 ás 15:15 horas desta tarde para dar a voz de alarma.
O persoal da central de emerxencias do 112 informou dos feitos a Urxencias Médicas e aos Bombeiros de Ribeira. A situación tamén foi posta en coñecemento do Grupo de Apoio e Emerxencias Municipal de Ribeira (GAEM), da Policía Local, da Policía Nacional e da Garda Civil de Tráfico.
Os efectivos sanitarios decidiron mobilizar ata o lugar do sinistro unha ambulancia e un helicóptero medicalizado. Con todo, a intervención da aeronave quedou suspendida, unha vez se confirmou o falecemento do varón.
Segundo se lle indicou ao 112, o axente falecido pertencía ao cuartel de Boiro. Tras o accidente, a circulación na vía quedou cortada, aínda que a esta hora a zona volveu á normalidade.
