Aurelio Pombo: Tono é un gran adestrador

Aurelio Pombo é un rapaz formado nas categorías base do Cabana e do Bergantiños, que pode actuar como central ou mediocentro.

Na actualidade, Aurelio defende a camisola nerazzurri do equipo senior do Cabana SD e hoxe analiza a situación do conxunto das Redondas en Adiante Galicia.

David Castro (@DavidCastro27)

P- Cales cres que son os factores que levaron ao Cabana a unha mala dinámica de resultados como a que está tendo?

R- Eu penso que en gran parte é debido á xuventude que hai no equipo, o que fai que sexamos un grupo ao cal lle costa manter unha regularidade, ademáis de que descoñecemos a forma de competir necesaria. Aínda que pouco a pouco esta dinámica vai cambiando e agora só queda reflexalo nos resultados.

P- Que intenta transmitirvos Tono nestes momentos tan complicados?

R- É un gran adestrador que sempre ten en conta a opinión de todos tanto dos máis veteranos coma a dos máis novos. Como di el para min non hai idades no fútbol e este feito transmite unha confianza moi necesaria para manter os ánimos con esta dinámica negativa, ademáis el sempre intenta animarnos.

P- A pasada semana sufristes unha derrota, un tanto polémica, ante un rival directo pola permanencia como é o Volantes de Baño, como están os ánimos no vestiario?

R- Pois os ánimos non están moi ben xa que parece que os árbitros non están o noso favor porque xa nos pasou mais veces pero o da semana pasada non ten nome. O sentimento que temos no equipo en común é dunha gran impotencia xa que nos xogábamos media tempada nese partido e dedicámoslle todo o esforzo e traballo para que nos ridiculicen desa forma.

P- Cal cres que son a solución para que o Cabana salga desta difícil situación?

R- Pois manter os ánimos, a esperanza e o esforzo, e despois ter algo de sorte, xa que se conseguimos isto, os resultados chegarán sós.

P- A vindeira xornada recibides ao Fisterra nas Redondas, un equipo que está a facer unha gran primeira volta, como afrontaredes ese encontro?

R- A verdade é que son un equipo de moi bos xogadores e moi serio que aspira ao ascenso pero nós ímolo afrontar da mesma forma que afrontamos os outros, tendo as ideas claras e intentar sacar algo positivo.

P –Esta tempada, os equipos da Costa non poderedes disfrutar do parón de Navidades pola disputa da Copa da Costa na que debutaredes ante o Cerqueda en Xaviña. Que esperades facer nesta competición?

R- É unha competición que non é o obxectivo principal para nós, pero intentaremos chegar o máis lonxe posible xa que é moi bonito ter a oportunidade de enfrontarte a grandes equipos da zona.