O goberno local de Corcubión respondeu as críticas lanzadas desde o PSOE, explicando que “Terra Creativa non é un proxecto municipal senón un proxecto que se desenvolve desde a alianza entre a Asociación Boca de Sapo, a Cooperativa Azul máis Verde e a Asociación Universidade Cromática das Virtudes.”
Aclaran que Terra Creativa e un proxecto de 13 meses de duración que dá continuidade a un traballo inicial de Boca de Sapo no Monte Cambeiro que é un espazo de “de titularidade municipal en cesión baixo un Acordo de Custodia de Territorio desde o 2021 á Asociación Boca de Sapo”.
Engaden que “os obxectivos conceptuais e de xestión do proxecto nada teñen que ver coa política e xestión municipal”.
Xestión municipal
E con respecto á xestión municipal fan un balance de xestión citando o programa “A maxia da Cultura”, presentacións de libros na Biblioteca municipal, Circuito de Teatro Amador, e actividades do Día Internacional da Muller Rural, Samaín, 25-N, Nadal, Andaina pola Igualdade, Día de Rosalía, etc.
Sinalan ademáis que a Concelleira de Cultura, Benestar, Igualdade e Muller, María Bella “ten un compromiso no actual goberno dunha adicación parcial establecida en 20 horas semanais, a que compaxina coa súa profesión na xestión e produción cultural á que leva dedicándose máis de vinte anos, no último tempo, tamén como parte da Cooperativa Azul máis Verde”.
E engaden que a citada cooperativa “non recibe ningún recurso do Concello de Corcubión para o desenvolvemento da súa actividade”.