Segundo informan desde a Xunta Directiva da Agrupación de Voluntarios de Protección Civil de Ponteceso, esta semana mantiveron unha reunión coa Secretaria Territorial da Consellería de Presidencia da Xunta de Galicia, Patricia Rodríguez Franco e co Xefe do Servizo de Emerxencias provincial da Xunta de Galicia, Victor M. Vázquez Pérez “co fin de solucionar a delicada situación na que se atopa a agrupación de Ponteceso”.
Segundo indican desde esta entidade “dende o ente autonómico non dan crédito a maneira de actuar do alcalde ante feitos coma o de excluir da vacinación pese a ser persoal esencial a certos voluntarios sen explicación algunha e enviando a outras persoas que non eran voluntarios, a orde de retirada dos vehículos da agrupación a xunta directiva para mantelos na base operativa pero que contrariamente se atopan en vivendas privadas, o intento de realizar un golpe de estado contra a directiva e poñer a dedo a xente que nin está dada de alta coma voluntario ou dispoñer a voluntarios para traballos que nada teñen que ver coa Protección Civil, sendo usados so para o interese persoal”.
Informan tamén que se acadou “un firme compromiso para empregar todos os medios necesarios para dar fin a esta situación o mais axiña posible para que a Agrupación de Protección Civil de Ponteceso poda volver a dar un servizo digno a todos os veciños de Ponteceso”