O Partido Socialista de Mazaricos presentou a súa candidatura o pasado sábado nun acto que se desenvolveu na Casa da Cultura da Picota que se encheu para este evento.
O candidato Francisco Javier González Trillo asegurou que a súa prioridade é dedicarse ao interese xeral “e polo tanto non é de recibo usar a política para intereses persoais”, polo que dixo que o seu compromiso é “acabar coa política dos favoritismos do noso concello”.
Tamén promete unha mellor atención no servizo de Axuda no Fogar, traballar pola consecución “do tan ansiado Centro de Día”, e promover un plan de limpeza municipal xa que a limpeza dos núcleos máis importantes “non é da satisfacción dos veciños”.
No seu discurso avogou por desenvolver o Plan Urbanístico e facer un Polígono Industrial, apoiar aos empresarios e asociación e organizar unha Gran Festa da Xuventude.
“Queremos un concello que non mire cara outro lado de cara ás empresas eólicas, mentres estas acumulan beneficios millonarios é nos deixan no concello unhas limosnas” declarou González Trillo.
O candidato socialista amosouse optimista de cara as vindeiras eleccións.”Non nos presentamos para estar sentados na bancada de oposición á espera das seguintes eleccións”.No acto tamén participou o presidente provincial do PSOE e alcalde de Dumbría, José Manuel Pequeño Castro.
