A plataforma pola Defensa do Castelo do Príncipe e o BNG de Cee agardan unha resposta positiva por parte da Xunta de Galicia.
A Valedora do Pobo admitiu a queixa presentada polo responsable da plataforma en Defensa do Castelo do Príncipe, Pablo Álvarez Caamaño e polo concelleiro do BNG de Cee, Serxio Domínguez Louro na que solicitaban que se cumprira a lexislación vixente e que a fortaleza da Ameixenda se abrira ao público un mínimo de catro días ao mes.
Despois de recabar o apoio unánime do pleno do concello de Cee e de recoller milleiros de sinaturas, decidiuse presentar unha queixa diante da Valedora do Pobo que foi aceptada e polo tanto desde esta institución iniciaranse as accións oportunas ante Consellería de Cultura, Educación e Ordenación Universitaria.
Dende a Plataforma en Defensa do Castelo do Príncipe e o BNG de Cee agardan “que a resposta por parte da Consellería de Cultura sexa satisfactoria e que tomen as medidas oportunas para solucionar o problema da apertura do Castelo de Ameixenda, tal e como indica a lei; problema que, de terse arranxado, melloraría o turismo non só do Concello de Cee, senón de toda a Costa da Morte, sendo un incentivo económico importante”.