@cristobalmourin // A Consellería de Cultura, Educación e Ordenación Universitaria formalizou o contrato de servizo de restauración das pinturas murais do muro norte da igrexa do mosteiro de San Xulián de Moraime, en Muxía (A Coruña.
O executivo autonómico destina 50.000 euros para esta mellora que ten un prazo de execución de cinco meses. Segundo a Consellería de Cultura as tarefas que se realizarán “consistirán na limpeza da superficie, aplicación de tratamentos contra o biodeterioro, consolidación do soporte e reintegración da policromía”.
Ver reportaxe- «Moraime, la joya oculta»
Tamén se retirarán os morteiros antigos que serán substituídos por outros novos. Realizaranse mapas de estado de conservación das pinturas localizadas no muro norte e que representan os sete pecados capitais “a través da personificación do pecados e da representación dos seres demoníacos que instigan os vicios e virtudes e que animan a practicar a penitencia e a oración”.
As pinturas sofren os efectos da humidade. Desde a Xunta lembran que en 2014 e 2015 leváronse a cabo obras atallar a entrada de auga por capilaridade e filtración nos muros da igrexa, nas que o goberno galego investiu máis de 105.000 euros.
A igrexa do antigo mosteiro de San Xiao de Moraime conta coa declaración de Ben de Interese Cultural, coa categoría de conxunto histórico, e constitúe un dos exemplos do románico galego.
