O treito forma parte da avenida de Tomé Taboada e ten unha lonxitude de 0,79 quilómetros, iníciase na intersección coa rúa Carmen Santiso e finaliza na intersección coa provincial DP-7702.
O Consello da Xunta autorizou hoxe o proxecto de decreto polo que se aproba o cambio de titularidade dun treito da estrada AC-404, situado entre os puntos quilométricos 0+570 e 1+350, cunha lonxitude de 0,79 km, a prol do Concello de Santa Comba.
O Concello de Santa Comba solicita o cambio de titularidade do tramo da estrada autonómica AC-404 (Santa Comba – Baio), comprendido entre o seu inicio e a intersección coa estrada provincial DP-7702, que discorre polo seu termo municipal. O tramo forma parte da avenida de Tomé Taboada e ten unha lonxitude de 0,79 quilómetros; iníciase na intersección coa rúa Carmen Santiso e finaliza na intersección coa DP-7702, próxima á Casa do Concello.
O tramo está clasificado como urbano e rexistra un tráfico de tipo principalmente local. A Consellería de Infraestruturas e Vivenda ten entre as súas funcións a tramitación dos cambios de titularidade das estradas incluídas nas redes dependentes da Comunidade Autónoma e das entidades locais.
Os primeiros 570 metros desa estrada pertencen á rede da Deputación da Coruña, polo que a Axencia Galega de Infraestruturas, de acordo co informe emitido polos servizos competentes, formulou a proposta favorable á transferencia de titularidade do treito da estrada AC-404 situado entre os puntos 0+570 e 1+350. Co cambio de titularidade, o Concello de Santa Comba poderá actuar sobre esta vía, de modo acorde coas súas características urbanas, e xa non serán de aplicación as restricións da normativa autonómica de estradas, como por exemplo as limitacións de usos ou actividades nas súas marxes ou os accesos.
O cambio de titularidade será efectivo ao día seguinte da publicación deste decreto no Diario Oficial de Galicia. A entrega dos bens formalizarase no prazo dos dous meses seguintes a esta publicación mediante a sinatura da correspondente acta de entrega.
