Despois do mitin da Coruña con Pedro Sánchez, o candidato socialista, Gonzalo Caballero visitou Camariñas. Como sinalou o político vigués, estaba “nun concello vermello” de “compromiso socialista”.
A alcaldesa Sandra Insua, lembrou ao veterano exalcalde de Vimianzo Alejandro Rodríguez, falecido este sábado.Tamén augurou que Caballero ía “ser o próximo presidente da Xunta” e puxo en valor que servirá para que a vila estea “presente”.
A candidata e concelleira socialista camariñana, Encarna Liñeiro apuntou:“Camariñas necesita un presidente que sepa onde está a Costa da Morte”. Tamén intereviu Diego Taibo que criticou a xestión de Núñez Feijóo.
Pola súa parte, Gonzalo Caballero, amosouse confiado nun cambio se “todos aqueles que o ano pasado votaron polas forzas progresistas” nas municipais e nas xerais acuden a votar “para facer unha Galicia mellor: con máis emprego e con mellores servizos públicos, sen esquecer o rural e dándolle impulso ás cidades”.
Caballero manifestou:“Só o PSdeG pode darlle a Galicia un goberno en conexión coa maioría de progreso, e fronte ao relato da dereita de que as eleccións están gañadas, a xente quere cambio en Galicia”.
Na súa intervención engadiu que “fronte á desmobilización e á inacción que quere o PP, nós temos ganas, ilusión, forza, mobilización e dinamismo porque somos o cambio posible e con garantías para Galicia”, enfatizou, antes de engadir que “non pode quedar na casa un só voto progresista”.
