Primarias no PSdeG- Villoslada difunde doce compromisos.
O deputado Juan Díaz Villoslada formalizou a súa precandidatura a secretaría xeral do PsdeG e lanzou os seus primeiros doce compromisos.“Anunciarei novas medidas orgánicas e de carácter político nas próximas semanas, pero entre os compromisos que presento hoxe destaco a necesidade de reforzar as canles de participación da militancia, así como a rendición de contas por parte dos cargos do PsdeG” indicou Villoslada.
Estes son os 12 compromisos
1- Potenciar a voz das comarcas para maior coordinación, contacto e proximidade coas agrupacións locais.
2- Revitalizar as Casas do Pobo como centros de debate, formación e xeración de valor para a cidadanía
3- Darlle ás mulleres o protagonismo que merecen nas institucións e cargos orgánicos do partido. A loita pola igualdade comeza por nós mesmos.
4- Crear unha rede social interna para debater ideas, propostas ou realizar votacións con novas canles de participación real.
5- Celebrar un foro anual da militancia coa presenza do SX, Executiva e cargos institucionais, con intervencións e preguntas abertas dos militantes
6-Ter unha executiva funcional paritaria e operativa formada por xente especializada na súa área que preste un servizo permanente a Galicia, á militancia e ás agrupacións
7-Esixir rendición de contas aos cargos públicos, cun calendario de reunións e encontros comarcais coas bases establecido polo territorio.
8- Impulsar as agrupacións inexistentes ou “durmidas”facendo un estudo pormenorizado dos concellos onde o partido non é activo e reactivar a presenza cunha persoa na Executiva que atenda de xeito directo ás agrupacións que están na oposición.
9- Captar talento e compartilo.Ter unha axenda de militantes ´voluntarios´especializados en temas, que poden impartir formación ou axudar cando as agrupacións o soliciten.
10- Abrir o partido á xuventude impulsando mecanismos para ampliar a nosa base e atraer á xente moza que garanta o relevo xeracional e mova a novos posibles votantes
11-Establecer a obligatoriedade de consultar á militancia decisións relacionadas coa estratexia política do partido, como por exemplo os pactos poselectorais ou a posición sobre asuntos de especial trascendencia.
12-Reforzar o partido coa figura dunha vicesecretaría xeral forte, no momento no que o Secretario Xeral asuma responsabilidades de goberno.
