”Feijoo deíxanos unha Galicia con máis paro, con máis precariedade e menos innovadora” dixo a candidata nacionalista que puxo a Carballo coma exemplo “do bo facer” dos gobernos do BNG.
A candidata do BNG á presidencia da Xunta de Galicia, Ana Pontón, visitou o concello de Carballo, desde onde comentou as iniciativas do BNG en materia de emprendemento para combater a herdanza do goberno do Partido Popular:”Feijoo deíxanos unha Galicia con máis paro,con máis precariedade e menos innovadora” manifestou.
Pontón propuxo a dinamización dos polígonos empresariais “que foron construídos con cartos públicos e están criando toxos” coa instalación de naves que se poidan alugar ós novos emprendedores en condicións ventaxosas. Tamén apostan por duplicar os fondos para I+D+I e para a concesión de microcréditos a xuro cero, entre outras iniciativas “para poñer a producir o país” porque segundo a candidata nacionalista “aquí non fallou a xente, aquí fallaron os gobernos”.Entre outras cuestión, suxiren a creación dunha banca pública galega e a “transformación do IGAPE nun instituto de crédito”.
Ana Pontón visitou as instalación do Fórum Carballo acompañada polo alcalde, Evencio Ferrero Rodríguez e por outros membros do Bloque Nacionalista Galego, e puxo á capital de Bergantiños “como un dos exemplos do bo facer dos gobernos nacionalistas” nunha bisbarra con “graves crises estruturais” e onde o BNG demostrou “que temos capacidade de gobernar” e impulsar políticas innovadoras.Despois desta visita, Ana Pontón Mondelo, mantivo unha xuntanza con empresarios do concello.O lema de campaña do BNG para as eleccións autonómicas é:»Construír Galiza con ilusión. Galiza contigo».
