Os partidos políticos galegos deixaron a un lado as súas diferenzas ideolóxicas e uníronse para asinar un manifesto a prol do idioma galego, nun acto promovido pola Mesa pola Normalización Lingüística e que se desenvolveu na alameda de Compostela, este mércores 15 de xullo coincidindo co 130 aniversario do pasamento da escritora Rosalía de Castro.
O presidente da Mesa, Marcos Maceira agradeceu a participación de tódolos grupos e desexa que este acto represente un cambio para mellora-la situación da lingua do país.O Partido Popular estivo representado polo deputado Agustín Baamonde, polo PSdeG acudiu a secretaria de organización, Pilar Cancela, polo BNG, o voceiro nacional Xavier Vence e Antón Dobao e Xavier Ron estiveron en nome de Anova e Esquerda Unida. Tampouco faltaron representantes de Podemos, Cerna, Compromiso por Galicia, Alternativa dos Veciños e Coalición Galega. Aínda que asinaron o manifesto non asistiu ninguén de Terra Galega nin de Converxencia XXI.
Logo das intervencións, e da lectura do manifesto a cargo da actriz Iria Sobrado , o acto rematou coa música de Guillermo Fernández e Guadi Galego.
No manifesto exprésase a necesidade de “abrir unha nova etapa de normalidade para a lingua galega, coa implicación de todos os sectores, afirmando conxuntamente a nosa intención de aplicación, mellora e introdución de todo canto for preciso para garantir o dereito a vivirmos en galego e conseguirmos para el verdadeira igualdade e oficialidade real, tomando como punto de partida os acordos comúns e amplos establecidos na Lei de Normalización Lingüística, na Lei de uso do galego como lingua oficial de Galiza polas entidades locais, e no Plan Xeral de Normalización da Lingua Galega de 2004”.