//Valoran positivamente os pasos dados e o “compromiso público adquirido”e agardan a entrevista do vindeiro luns co conselleiro de Industria, Francisco Conde// Foto-Juan Louro Cambeiro.
O comité de empresa de Ferroatlántica celebrou este sábado unha asemblea de traballadores na que se decidiu “suspender temporalmente” o peche e as mobilizacións diante do concello ata a celebración o vindeiro luns dunha xuntanza co conselleiro de Economía e Industria, Francisco Conde.Valoran positivamente os pasos dados nos últimos días e sobre todo a xuntanza do presidente da Xunta, Alberto Núñez Feijóo,cos alcaldes da Costa da Morte que serviu “para que a Xunta de Galicia saíse da ambiguedade”.
Nun comunicado de prensa, o Comité de empresa quixo agradecer a implicación social, o apoio institucional de tódolos alcaldes da comarca e a boa acollida que tiveron no seu peche no concello de Cee.Tamén agradecen a axuda das organización políticas do ámbito parlamento e fóra del e de asociación, comités, autónomos e pequenas empresas “destacando aqueles locais de hostalería que o longo dos días de peche abasteceron desinteresadamente de alimentos e bebida as persoas que estiveron no mesmo”.
Polo tanto valoran “o compromiso público adquirido, no que se corresponsabilizan os alcaldes da comarca, de facer valer o título concesional e polo tanto, a non autorización da segregación, no caso de que a empresa rexistre a venda na Xunta, ademais de informar de calquera movemento que se produza. Compromisos que terán que concretarse na reunión que o vindeiro luns o Comité de Empresa manteña co Conselleiro”.Posteriormente a este encontro volverán a ter unha nova asemblea para tomar as oportunas decisión.
Nesta xornada o alcalde de Dumbría, José Manuel Pequeño Castro, avogaba en Adiante Galicia, por continuar no clima de unidade e sen baixar a garda, aínda que expresaba a súa satisfacción pola xuntanza con Núñez Feijóo.