//O concello exclúe o galego da sinaléctica pública das praias de Area Maior e Canido// A Mesa pola Normalización advirte que o goberno malpicán está vulnerando a lexislación vixente//
A sección da Mesa pola Normalización Lingüística en Bergantiños denuncia a exclusión do galego das sinais informativas que hai nas praias de Area Maior e Canido e informan que “a exclusión do galego na sinaléctica pública vulnera a lexislación vixente en materia lingüística”. Por este motivo, presentou un escrito no rexistro municipal no que piden a reposición do idioma galego.
Desde A Mesa lembran que a Lei de Normalización Lingüística estabelece que “os poderes públicos de Galicia promoverán o uso normal da lingua galega, oralmente e por escrito, nas súas relacións cos cidadáns” e que tamén a Lei 5/1997 da Administración Local de Galicia di que “O galego, como lingua propia de Galiza, éo tamén da súa Administración Local”.
Tamén engaden que a mesma normativa indica que “todos os actos de carácter público ou administrativo que se realicen por escrito en nome das corporacións locais redactáranse en lingua galega”, o que inclúe os rótulos e sinais da vía pública e dos edificios municipais.
Desde este colectivo no ocultan a súa sorpresa porque o goberno que preside Eduardo Parga Veiga(PP) instalara novas sinais onde se usa a denominación “concejalía” que consideran un feito “insólito na comarca” e constitúen “un paso atrás no uso do galego pola administración local de Malpica”.
O responsábel da Mesa na comarca, Xosé Cotelo, preguntou ironicamente ao goberno local se tamén ten pensado substituír “Concello” por “Concejo” e reclamou ao goberno malpicán “respecto pola lingua propia de Galiza e o cumprimento da lexislación en materia lingüística”. Xosé Cotelo declarou que “a lingua galega precisa de reposición do seu uso, de promoción e de prestixio” pois “de agresións e reducións de dereitos ao galego xa está o caixón cheo”.