O BNG pide que non se permita o proxecto “Isabela II” que afecta as comarcas de Xallas, Bergantiños e Soneira e alerta do uso do cianuro.
O proxecto Isabela II suporá a reactivación da mega minería
O Bloque Nacionalista Galego pídelle a Xunta de Galicia que “paralice as novas autorizacións de investigación mineiras que están solicitadas” e entende que o proxecto Isabela II que afecta os concellos de Zas, Santa Comba, Vimianzo e Coristanco suporá a reactivación da mega minería e dun modelo “esquilmador dos nosos recursos, do noso territorio e da nosa riqueza natural”.
O voceiro parlamentario do BNG, Francisco Jorquera explica que “a minería de ouro ten unha clara compoñente especulativa” e que no caso do proxecto Isabela II os expertos advirten de que “a utilización do cianuro sería inevitábel e requiriría tamén a construción dunha planta de tratamento”.
Iniciativas parlamentarias do BNG
Os nacionalistas veñen de presentar diversas iniciativas parlamentarias, entre elas unha proposición non de lei para oporse a “un modelo que destrúe máis postos de traballo que os que crea e que fai que os beneficios emigren e os custes de internalicen”. Desde o BNG recollen a queixa de distintos colectivos sobre a falta de información para facer alegacións e para consultar o expediente.
Esta mesma semana, Desde Adiante Galicia, o portavoz da Plataforma en Defensa de Corcoesto e Bergantiños, Bráulio Amaro emprazaba os concellos de Zas, Santa Comba, Vimianzo e Coristanco a facer presión e presentar alegacións.
Tamén o grupo da Alternativa Galega de Esquerda presentou unha pregunta para resposta en comisión para que a Xunta de Galicia ofreza información sobre esta proposta mineira.