Os alcaldes de Monforte, Bueu, Mondoñedo, Vimianzo e Zas do BNG apostan por candidaturas de unidade que poderían compartir con forzas estatais como Podemos ou IU. A idea choca coa folla de ruta da dirección do BNG que apostan “por romper calquera supeditación á forzas estatais”.
Cristóbal Mourín
Varios alcaldes nacionalistas asinaron o manifesto “Somos Maioría” e apostan por “promover e alentar candidaturas de unidade para as eleccións municipais sublimando a importancia decisiva que teñen os concellos como espazos de transformación e emancipación”.Isto suporía unha porta aberta a alianzas que poderían incluír a BNG, Anova, Podemos ou mesmo Izquierda Unida. Segundo a TVG os alcaldes de Monforte (Severino Rodríguez Díaz), Bueu (Félix Juncal Novas), Vimianzo(Manuel Antelo Pazos) e Zas (Manuel Muiño Espasandín) apoian un documento e defenden que se presenten “candidaturas cidadáns plurais a partir do protagonismo político da cidadanía”.Aínda que non o asinou, o alcalde de Mondoñedo, Orlando González tamén se amosou de acordo coas premisas básicas, na televisión pública de Galicia. A maioría dos rexedores están na liña de Abrente, a corrente minoritaria no BNG, dirixida por Carlos Aymerich.
A dirección do Bloque non está pola laboura
A secretaria de implantación e estratexia municipal do BNG, Goretti Sanmartín rexeitou entrar neste debate porque “é moi cedo para falar de pactos” e opina que “o proceso ten que ser pola base, tendendo pontes” e buscando confluencias.Pero o camiño está marcado. E así o deixou claro o voceiro nacional, Xavier Vence, no día de Galicia, avogando por “galeguizar os debates e galeguizar as alternativas políticas, pensadas desde aquí e para aquí”. Vence insistiu en “romper calquera supeditación á forzas estatais”, defendendo a unidade de acción arredor dun proxecto nacionalista de esquerdas,” aínda que tendeu a man “a todos e todas as que queiran sachar na gran agra do nacionalismo”. Tamén resultou premonitorio un artigo recente dun dos grandes referentes do nacionalismo e da UPG, Francisco Rodríguez que non se amosou partidario deste tipo de coalicións e amosou a súa discrepancia con Pablo Iglesias.