Compostela Aberta e BNG apoiaron as contas. O PSOE facilitou a súa aprobación mediante a abstención.
A corporación local do concello de Santiago de Compostela aprobou os orzamentos para este ano 2017, que ascenden a 106 millóns de euros. Como estaba anunciado, o documento contou co voto favorable de Compostela Aberta e do BNG, a abstención do PSOE e ao voto en contra do Partido Popular.O alcalde de Santiago,Martiño Noriega, valorou a “capacidade de diálogo” e avogou por “prorratear esforzos e recoñecementos”.
A concelleira de Facenda María Rozas cualificou os orzamentos de “expansivos, corais e participativos”. Rozas falou tamén da herdanza da débeda do PP, que estaba en 45 millóns e que agora se cifra nuns 33 millóns de euros.
Desde Compostela Aberta pensan que se trata dunhas contas “de cambio contra as políticas de austeridade, recortes e sufrimento”. Valoran o aumento das partidas(14%) en cultura ou Axuda no Fogar, ou a pretensión de buscar o equilibrio entre a Compostela rural e a cidade. E acusan ao PP de “estar illado no seu propio bloqueo”.
Para o Partido Popular, os orzamentos reflicten a “incapacidade do goberno” que buscou un “matrimonio de conveniencia” co BNG e co PSOE.“Estas contas non lle van cadrar ao goberno, e o que é peor, non lle van cadrar ao concello.Este será outro ano e outra oportunidade perdida para a cidade” sinalou Agustín Hernández que dixo que era un orzamento “irreal e ficticio”.
O voceiro socialista Paco Reyes afirmou que as contas de Compostela Aberta “teñen unha impronta socialista”. Anunciou que agora comezaba unha etapa de “fiscalización” porque “máis importante que a aprobación é a súa execución”. Para o PSOE son uns presupostos mellores cos de 2016 pero “queda moito por facer”.
O BNG apoiou o documento. Rubén Cela aludiu ao “rol construtivo” do seu partido.“Ninguén pode defender que Santiago de Compostela estaría mellor sen Orzamento, prorrogado ou vinculado a cuestión de confianza” apuntou Cela.
