O Bloque Nacionalista Galego actúa con celeridade e pide explicacións, despois da nova avanzada por Adiante Galicia, presentando unha batería de preguntas para o vindeiro pleno municipal do concello da Coruña.
O BNG reacciona con celeridade
A portavoz municipal do Bloque Nacionalista Galego coruñés, Avia Veira presentou hoxe no rexistro municipal, unha batería de preguntas relacionadas coas problemáticas denunciadas pola dirección do centro de educación infantil e primaria plurilingüe Anxo da Garda, e que avanzou este mércores en primicia o xornal dixital Adiante Galicia (acceder a nova aquí).
O propio grupo municipal agradeceu nas redes sociais a difusión desta demanda do colexio emprazado en Monte da Moa, por parte do noso medio de comunicación. Os nacionalistas reaccionaron ante o coñecemento das queixas, primeiro contactando co centro educativo e logo trasladando as queixas ó concello.
Melloras no patio e solución ó problema da conserxería
No vindeiro pleno ordinario, Avia Veira preguntará ó executivo que preside Xulio Ferreiro porque non se atenden as demandas da dirección do C.E.I.P. Anxo da Garda, e tamén se desde o goberno consideran “xustificado que haxa xornadas nas que o servizo de conserxería non está atendido”.
Desde o BNG tamén queren saber as previsións para o arranxo das deficiencias e para dar solución ós problemas da conserxería, e o feito de que a día de hoxe a dirección do centro non encontrara ningunha resposta positiva desde o goberno da Marea Atlántica.
Se queres contactar coa nosa redacción:
Teléfono- 881817525 – 627217963
Canle WhatsApp- 618417894
correo electrónico contacto@adiantegalicia.es
