– Xosé Manuel Lema-
Desde as terras do poeta Pondal chega unha brisa de rock, un Lóstregho musical para animar este cotarro. E nos seus percorridos os “Lobos de Metal” deron con Bryan Martínez, baixista da banda de Ponteceso.
Forma este trío con Josiño da Morena e Joseíño García. “A cuarentena pillounos ensaiando” comenta Bryan. De momento continúan “procurando o son que estamos buscando” e están a piques de lanzar o seu primeiro EP. Xa coñecemos o tema “Zarpazo” que “vai a ser o máis suaviño do EP”.
Teñen xa un repertorio composto por temas propios e queren “ter unha oportunidade”. De momento o seu vídeo-clip está circulando ben e xa alcanzaron certa repercusión nos medios de comunicación.Cantan en galego e agardan ofertas para tocar. “Hai que apoiar as bandas pequenas” reivindica Martínez no programa semanal de rock, metal e poesía que se emite en Radio Xallas.
