O portavoz local do Bloque Nacionalista Galego en Ferrol, Iván Rivas, presentou esta mañá no rexistro municipal máis de 500 recursos contra o recibo da taxa de saneamento que segundo sinalan os nacionalistas «o goberno local está a aplicar en base á ordenanza fiscal do goberno de Rey Varela».
Desde o BNG censuran a decisión do goberno de Ferrol en Común «de incluir o cobro desta taxa nos recibos ordinarios de Emafesa coa clara intención de dificultar que os veciños e veciñas poidan recurrilos ou devolver o seu importe». Están convencidos de que están a conculcar os dereitos veciñais e as garantías administrativas dos cidadáns, ante un goberno que ten «como prioridade salvagardar os intereses de empresas privadas».
