Áurea Domínguez mantén a súa palabra de aspirar á alcaldía de Fisterra e de abrir as portas a un goberno de esquerdas como alternativa á forza máis votada nos últimos comicios, o PP liderado por Luis Insua.
Nunha rolda de prensa, desde Alternativa dos Veciños de Fisterra explicaron os avances nas negociacións. Lembraron a decisión do BNG de apoiar a investidura pero “sen integrarse no goberno”.
Piden claridade e transparencia ó PSOE
Con respecto ao PSOE, informaron dos contactos que houbo e aseguraron que estaban á esperar. Aproveitaron o acto “para solicitarlle ó PSOE que sexa claro e transparente na súa posición sobre o apoio para a investidura como alcaldesa de Fisterra da nosa candidata, Áurea Domínguez Sisto, o vindeiro sábado 17 de xuño, sen descartar que nun futuro se puidera acordar un pacto de goberno”.
Alternativa dos Veciños non descarta gobernar en solitario:”Nós sentímonos capaces de gobernar en minoría. Temos forza e ilusión e, si conseguimos os apoios necesarios para a investidura, gobernaremos dispostos a acadar os acordos que sexan necesarios con tódalas forzas políticas para mellorar Fisterra e a calidade de vida dos nosos veciños. Esta dispoñibilidade estará igualmente presente no caso de que quedemos na oposición.”
