A CIG-Saúde desmentiu as informacións que sinalan á orixe do gromo de Covid-19 no centro de saúde de Vimianzo nun contaxio detectado “na sala de descanso” do recinto, e que “as persoas que non son asiduas a esta sala non manifestaron sintomatoloxía ou directamente deron negativo”.
Afirman que está informacións “non concordan co ocorrido no centro” e non aforran crítica contra a Xerencia da Área Sanitaria da Coruña-Cee:“De novo, ante a imposibilidade de filiar o contaxio nun centro, se alude á falta de precaución por parte das e dos profesionais, botándolles a culpa da transmisión do virus, e tachándoas/os de irresponsábeis fronte á poboación do concello”.
Piden unha desculpa pública á Xunta
Desde a CIG “esiximos da Xerencia unha desculpa pública, xa que os e as profesionais que están a prestar servizo no centro de Vimianzo non merecen este escarnio público».
Pensan que as declaracións son “inaceptábeis” e ofrecen unha imaxe errónea das profesionais do centro. A responsábel da CIG-Saúde da Coruña, Lucía Peón, explicou que nos días previos ao contaxio, o colectivo de profesionais do centro xa alertou da alta carga de traballo que tiñan, mais «non só non se lles deu solución e se seguiu sobrecargando, senón que agora se transmite á poboación unha mensaxe de profesionais que non atenden e se contaxian na sala de descanso».
