O concello de Mazaricos avanza na posta en marcha do ximnasio e na construción dun campo de tiro. Juan Blanco explicou a situación do Polígono industrial.O popular Nico Martínez reserva a súa valoración sobre o pleno.
Luz verde ao ximnasio e ao campo de tiro
Sen votos en contra, o pleno do concello de Mazaricos dou luz verde ao regulamento do servizo público do ximnasio municipal que segundo o rexedor estará en funcionamento no prazo dun mes.
Tamén se aprobou a cancelación do consorcio dos montes Pedroso, Val, Sixto e outros, que permitirá a construción dun Campo de Tiro no Pino do Val. Así mesmo a corporación aprobou a normativa de camiños despois do período de alegacións.
Doce mámoas nun Polígono Industrial
En resposta a un rogo da oposición, o rexedor informou sobre a situación do Polígono industrial. Explicou que o estudo arqueolóxico encargado polo concello ditamina a existencia de doce mámoas na zona.
Blanco Riveiro explicou que, no caso de que se venda unha finca, a persoa propietaria deberá facer un estudo arqueolóxico “que rolda os 8.000 ou 10.000 euros euros e logo un estudo posterior de 6.000 euros.Se aparece algo, pode que non a poida usar e se ten a nave feita e despois quere unha explanada anexa ou un novo edificio, ten que repetir o control arqueolóxico” detallou Blanco.
O grupo de goberno subliñou que a cuestión do polígono estivo paralizada durante “vinte anos de goberno do PP” sen “informar destas continxencias aos cidadáns”. O executivo do BNG encontrouse “esta sorpresa” coa chegada ao goberno e ao pretender “iniciar os trámites para buscar solucións”.
Por último, Juan Blanco emprazou ao portavoz do PP, Nico Martínez, a non nomear na prensa a persoas particulares “que non participan na vida pública” e pediulle que se centrara “nos temas do concello”. O alcalde tamén amosou a súa estrañeza polo feito de que os catro concelleiros do PP se ausentaran da habitual quenda de intervencións dos veciños.
Nico Martínez reserva a súa opinión
Consultado por esta redacción sobre a súa valoración do pleno, o portavoz do Partido Popular de Mazaricos, Nico Martínez Almallo, remitiuse a unha nota de presa que pretenden difundir desde o partido nas próximas horas, e que difundiremos tan pronto nos chegue.