O portavoz municipal do Partido Popular de Mazaricos tacha ao alcalde nacionalista Juan Blanco(BNG) de “demagogo” por presumir de aforro na súa xestión cando “falta a realidade”.
Nico Martínez critica que o alcalde presuma de que o seu tenente de alcalde non ten soldo e que os demais concelleiros non cobran mentres gasta por outra banda:“Do que non di nada o alcalde é dos case 3.000 euros que practicamente todos os meses facturan ao Concello dúas compañeiras de partido en concepto de reportaxes gráficas ou de organización de eventos”.
Martínez Almallo denuncia o “malgasto”que supón o contrato por dous anos que o Concello de Mazaricos aprobou no seu día para a xestión e mantemento das redes sociais municipais.
“Parécenos unha barbaridade que un municipio como o noso destine 40.000 euros a este capítulo cando, ademais, o propio alcalde afirmou que a empresa non realiza o seu labor de forma adecuada”.Nun comunicado de prensa, os populares pensan que este traballo podería desenvolverse con operarios municipais.
Sobre o último pleno
Nico Martínez referiuse ao último pleno celebrado no concello para instar ao rexedor a negociar coa Xunta melloras no transporte público:“Hai concellos que lograron ter máis liñas, pero para iso é necesario que o alcalde negocie co executivo autonómico aínda que non sexa do seu partido e deixe de culpar sempre a terceiras persoas dos seus fracasos na xestión municipal”.
Desde o Partido Popular de Mazaricos quéixanse da falta de información sobre a Semana Gandeira:“O alcalde presume de transparencia, pero cada vez que lle pedimos algún documento atopámonos con problemas” asegurou o portavoz popular quen puxo o acento para xustificar esta falta de información sobre a organización da Semana Gandeira no feito de que sexa un familiar do alcalde o que presida a asociación que percibe as achegas tanto dos colaboradores como a do concello.