“Somos xente de palabra”. O grupo de goberno de Mazaricos lanza “un diario do alcalde e dos seus concelleiros” na rede.Ademais pretenden abrir unha canle de comunicación veciñal.
O día a día do concello de Mazaricos
Unha das frases máis repetidas na pasada campaña electoral do BNG foi recuperada para crear unha web:”Somos xente de palabra”. Con este novo espazo na rede www.somosxentedepalabra.org os concelleiros nacionalistas pretenden “ir contando o día a día no concello” e tamén “abrir unha vía de comunicación alternativa e un buzón de suxerencias para todos e todas”.
O equipo de goberno de Mazaricos está formado polo alcalde, Juan Blanco e polos concelleiros Beatriz Alvite, Esteban Pereiro, Catarina Beiro, Juan Manuel García, Vanesa Pereira e José Miguel Blanco Martínez.
Subvención de 96.000 euros para o ximnasio municipal
Nesta nova web “Somos xente de palabra” dan conta de novidades como a recente subvención nominativa de 96.000 euros aprobada pola Deputación provincial que permitirá, xunto cun investimento aproximado de 24.000 euros de fondos propios, o equipamento do ximnasio municipal, como informaba a semana pasada Adiante Galicia.
O concello de Mazaricos tamén é noticia esta fin de semana pola inauguración este sábado 2 de abril dunha área de autocaravanas e pola celebración do Festival de Primavera a cargo da Escola de Música moderna do concello.
Recentemente en Adiante Galicia mantíñamos unha conversa co alcalde de Mazaricos, Juan José Blanco Riveiro para repasar a actualidade municipal. Se queres escoitar a entrevista este é o enlace.«Estou aquí para gobernar e cambiar as cousas».
