O candidato ao Congreso polo BNG, Néstor Rego, amosouse optimista de que o seu partido vai “vencer ás enquisas” e asegurou que “o BNG está disputando un escano na provincia da Coruña con Vox” polo que “o voto ao BNG é o voto máis útil para frear a entrada da ultradereita reaccionaria, antigalega , racista e machista que estamos padecendo”.
“Se nós non entramos, entra Vox”
Rego ten claro que “se nós non entramos, entra Vox” e pediu “concentrar tódolos esforzos en chave galega” para que “Galicia teña unha voz propia sen dependencias nin submisións”.
Nunha entrevista no programa “Na Encrucillada” de Radio Xallas comprometeuse a derrogar a “lei mordaza”, a contrarreforma laboral, a LOMCE “e a recuperar o Pazo de Meirás de forma inmediata”.
Lamentou que as demais forzas dependan de Madrid e que organización coma Podemos ou En Marea apoiaron uns orzamentos xerais do estado que discriminaron a Galicia.
“Prezos dignos para o leite e a carne”
Así mesmo demandou un plan estratéxico para o sector agrogandeiro, máis servizos no medio rural e uns “prezos dignos para o leite e a carne”. Sobre a fauna salvaxe propuxo un plan de xestión e un estudo detallado, promovendo no caso do xabaril “a captura por métodos non lesivos e que permitían a esterilización de modo que se manteña a fauna”, e que haxa compensacións polos danos “de maneira áxil”.
Postos de traballo
Unha das prioridades do BNG para a provincia coruñesa é “garantir os postos de traballo” xa que “hai cinco ou seis empresas que teñen miles de postos de traballo e que están en risco de desaparecer”.
Néstor Rego considera importante “unha tarifa eléctrica galega” que baixe o custo da electricidade, o saneamento das rías, ou a mellora das infraestruturas ferroviarias.O candidato do Bloque tamén anunciou neste programa que Alberto Calvelo será o candidato á alcaldía de Santa Comba.
