O conselleiro de Medio Rural José González falou no programa “Na Encrucillada” de Radio Xallas. Escoita a entrevista neste audio a partir do minuto 60 de programa.
Plan estratéxico do sector lácteo
O conselleiro do Medio Rural da Xunta de Galicia asegurou que vai a ser “inflexible” na defensa dun prezo xusto para o leite “que se ten que construír sempre a partir do custe de produción e cun marxe de beneficio, xa que non pode ser que haxa venta a perdas”.
José González referiuse ao plan estratéxico do sector lácteo que prepara o seu departamento “de acordo con todo o sector” e que agarda que sirva para “fortalecer o sector pola vía da profesionalización e do coñecemento dos custes”.
Calcular os custes de producción para o incremento de prezos
Nesta entrevista indicou que “desde a consellería traballamos para ter un programa informático para o cálculo dos custes de produción” e precisou que “nós non podemos impoñer prezos” pero si traballar na dirección de detectar os gastos do produto e lograr “incrementar o prezo porque a calidade que temos ten que contribuír a que o consumidor final sinta a necesidade de pagar máis polo noso leite”.
“Mobilizar a terra a través de diferentes mecanismos”
A estratexia debe asentarse en tres piares, a profesionalización, a rendibilidade e a necesidade de mellorar a base territorial. Neste último aspecto subliñou o carácter minifundista de Galicia con once millóns de parcelas catastrais en rústica.
“As concentracións parcelarias fan un bo papel pero temos que afondar e nalgúns sitios facer reconcentracións” apuntou o conselleiro que anunciou a posta en marcha “dunha nova lei de recuperación e posta en valor da terra agraria de Galicia”.
A idea básica é a de “mobilizar a terra a través de diferentes mecanismos” para dar resposta á necesidade dos gandeiros. Neste ano 2019 aprobarase a normativa e estableceranse proxectos piloto que afectarán a 10.000 has.”Algúns deste proxectos van ir ao sector gandeiro de leite” precisou.
José González Vázquez agarda conseguir que “se hai fincas nas que o propietario non se pode localizar que poidan ser xestionadas polos nosos gandeiros” e así aproveitar esa “terra extraordinaria”.
Unha actividade económica rendible
En resposta as preguntas xurdidas en Radio Xallas, González recoñeceu que na Xunta “estamos francamente preocupados” pola problemática do xabaril e manifestou que se está a traballar no incremento de batidas por parte dos cazadores, en posibilitar a comercialización da súa carne ou nunha liña de axudas polos danos.
Por último, augurou que “no rural vai haber actividade económica rendible” e se ben citou distintas axudas da administración galega está convencido de que “a mellor subvención é a garantía de rendibilidade nas explotacións”. O conselleiro do Medio Rural foi entrevistado “Na Encrucillada” por Xoán Ramón Alvite, Manolo Rodríguez Caamaño e Xosé Manuel Lema.