// Luís Villares cualifica a Feijóo de ignorante e covarde político//As traballadoras do SAF vimiancés protestan pola política privatizadora de Manuel Antelo//Antón Sánchez:”Temos un país rico pero o goberno non é noso//
A Casa da Cultura de Vimianzo acolleu un mitin de En Marea.Nas portas do recinto, as sete traballadoras do Servizo de Axuda no Fogar e un grupo de persoas, protestaban pola política privatizadora do alcalde, Manuel Antelo Pazos, con pancartas nas que pedían que os servizos sociais non se converteran nun negocio nin que se privatizaran e nas que aludían as causas xudiciais do rexedor soneirán.Estiveron ata despois de rematar o acto.
Foi precisamente o alcalde, Manuel Antelo, o que abriu o acto criticando a falta de investimentos da Xunta no seu concello. Despois falou a candidata Margarita Barahona que pediu un cambio político “porque todo está podre” e denunciou a “man dura” do PP contras as maiorías sociais. Outra candidata, Luca Chao tivo palabras de eloxio para o alcalde vimiancés polo “resultado histórico” acadado nas eleccións municipais que “por algo sería” e afirmou que persoas coma ela “aprendemos de Antelo e de moitos alcaldes coma el”.
.jpg)
O cabeza de lista pola provincia da Coruña, Antón Sánchez, lamentou que “moita xente perdeu o emprego por culpa de empresarios corruptos como Méndez ou Gayoso”. Para Sánchez García “temos un país rico pero o goberno non é noso”. Arremeteu contra a complicidade do PP coas grandes empresas:”O señor Villar Mir ten dereito de pernada sobre o Río Xallas” dixo. Sánchez convidou ós veciños da comarca a mobilizarse e actuar “como axentes electorais de En Marea”.
O aspirante á presidencia, Luís Villares, cualificou de covardía e ignorancia política a actitude de Feijóo de non querer participar nun segundo debate e ademais porque “era o único que ignoraba que Marcial Dorado era un narcotraficante, ou que ignora que Baltar é un acosador, debe ser que ignora tamén que as eleccións galegas son ao Parlamento de Galicia non a presidencia da República».
“Atila Núñez Feijóo non cree no autogoberno” denunciou Luís Villares, que definiu como “sete anos de barbarie” os gobernos de Feijóo:”Un país xusto non deixa morrer os enfermos na cama” comentou en relación ao tratamento da hepatite c. Na súa proposta defendeu “unha nación que é ante todo un proxecto de solidariedade e convivencia”, e propuxo a posta en marcha dun plan de emprego rural e dun plan de desenvolvemento da industria láctea de transformación, entre outras medidas para facer “un país xusto”.
