Xosé Manuel Beiras insiste no partido instrumental para as eleccións autonómicas e reivindica o espírito das Irmandades da Fala, nun 25X no que Anova contou co apoio de Carlos Aymerich.
Anova Irmandade Nacionalista celebrou o 25 de xullo cunha homenaxe ás Irmandades da Fala cun acto no parque de Galeras en Santiago de Compostela, que tivo como principal atractivo a intervención de Xosé Manuel Beiras que insistiu en que a solución de cara os comicios autonómicos é un partido instrumental:”Unha En Marea convertida en coalición deixa de ser En Marea” dixo Beiras que tamén lanzou mensaxes reivindicativas:»O espírito das irmandades está nas mareas: por dous motores:o pobo galego como suxeito político e a República”.Xosé Manuel Beiras apostou “por comezar outra vez a tarefa histórica de liberación, fronte ao totalitarismo larvado”.
Tamén interveu o exdirixente do BNG e membro do Foro Galego, Carlos Aymerich que insistiu na necesidade de artellar unha iniciativa ao PP que non poña por diante as siglas, a eurodeputada Lidia Senra, Antón Sánchez ou Iria Otero.Antón Sánchez percibe que este foi “o último día da patria con Feijóo” e dixo que era preciso “retornar o poder aos de abaixo é a nosa tarefa neste día de reivindicación popular e nacional”.
Lidia Senra puxo en valor o traballo das mulleres e a necesidade de que o cambio político sexa “feminista, nacionalista e de esquerdas”. Tamén criticou o papel da Unión Europea “cuns estados que nos negan a capacidade de decidir sobre o noso”.O acto contou coa presenza de varios alcaldes, entre eles Martiño Noriega, ou os deputados Alexandra Fernández e Miguel Anxo Fernán Vello, e rematou cun xantar de confraternidade.
